Климакс даврида аёллар овқатланишини коррекциялашни илмий асослаш

Abstract

Клиник ва профилактик тиббиёт соҳасида эришилган ютуқларга қарамай, юрак-қон томир, гастроэнтерологик, эндокринологик, онкологик, гинекологик ва бошқа тизимлар касалликлари сони йил сайин ўсишда давом этмоқда. Шунингдек, семизлик, артериал гипертензия, қандли диабет, климактерик синдром ва шу каби бошқа алиментар-боғлиқ касалликлар замонавий жамиятда эпидемия тусини олган. Бироқ касалланишлар ва беморлар ўлимини камайтириш борасида аҳамиятга молик натижаларга эришган мамлакатларнинг тажрибаси муваффақиятга эришиш кўп тарафлама ҳаёт тарзини ўзгартиришга боғлиқлигидан дарак беради. Айнан шу омил энг муҳим йўналиш сифатида аҳолининг феъл-атвор кўникмалари ўзгаришларини белгилайди (Рrohozka И.О. et al., 1993; Е.В. Фролова ва бош., 2002; Е.Н. Лобикина ва бош., 2007). Профилактика масалаларини кўриб чиқарканмиз, шуни ҳам таъкидлаб ўтиш жоизки, жисмоний юкламалар, зарарли одатлар сабабли касалликларнинг, юқумли табиатга эга бўлмаган касалланишларнинг кўплиги даражасининг ортиб боришини аниқлаш билан бирга нотўғри овқатланишнинг организмга таъсирини ҳам тан олиш лозим (Шайхова Г.И., 2011).