Abstract:
Диссертация мавзусининг долзарблиги ва зарурати. Термик куйиш (ТК) жароҳатланишларнинг кенг тарқалган тури бўлиб, жаҳон соғлиқни сақлаш ташкилотининг маълумотларига кўра (ЖССТ) «...барча жароҳатланишлар орасида учинчи ўринни эгаллайди ва ногиронликнинг асосий сабаби бўлиб, уни даволашда ҳам кўп вақт, ҳам кўп маблағ сарфланади...» . Бу турдаги жароҳатланишлар оғир кечганлигидан, организмда деярлик барча бошқарув тизимларни бузади, жумладан, иммун тизим фалажланади, натижада аксарият ҳолларда дисциркуляция, яллиғланиш, сепсис турдаги инфекция ривожланиб, полиаъзо етишмаслигига олиб келади. Термик куйишда кузатиладиган «...кучли зарба, чуқур шикастланишлар, метаболик бузилишлар, эндокринопатия, эндоген заҳарланиш, аъзо ва тўқималарга оқсил ва энергиянинг етишмаслиги умумий ҳолда иммунобиологик ҳимоянинг заифланишига олиб келади...» . Организмнинг иммун тизими иш фаолиятини куйиш касаллигининг патогенезига боғлаш, иммун тизимнинг марказий ва периферик аъзоларида ривожланадиган патоморфологик ва функционал ўзгаришларни батафсил ёритиш, бу касалликнинг иммунодиагностикасини баҳолашда ва куйиш касаллигини даволаш муаммоларини ҳал этишда янги истиқболлар очишини кўрсатади.
