Abstract:
Дунёда 850 миллион киши турли буйрак касалликлари билан хасталанган. Тахминларга кўра, «...сурункали буйрак касаллиги (СБК) 2040-йилга бориб, бутун дунёда хаёт давомийлигининг қисқаришига олиб келувчи сабаблар орасида 5-ўринни эгаллайди...»1. Даво чоралари ўтказилмаган тақдирда ва беморларда оғир юрак-қон томир касалликлари (ЮҚТК) ёки бошқа асоратлар ривожланганида, СБК касалликнинг терминал давригача кучайиб бориб, бу ҳолатда хаёт фаолияти кўрсаткичларини сақлаб туриш учун гемодиализ ёки буйрак трансплантацияси ўтказиш талаб этилади. Терминал буйрак етишмовчилиги бўлган беморларнинг кўпчилиги гемодиализ билан даволанмоқда ва уларнинг улуши барча буйрак ўрин босувчи терапияси олаётган беморларнинг 80%ини ташкил этмоқда. СБК билан оғриган беморларнинг асосий ўлим сабаби, юрак-қон томир патологиялари кузатиладиган асоратлар хисобланади. Юрак-қон томир касалликлари ва ўлим кўрсаткичи, диализдаги беморларда, айниқса ёш ва ўрта ёш аҳоли орасида, ўрин босувчи терапиянинг самарадорлигини пасайишига олиб келувчи асосий сабаблардан ҳисобланади. Буйрак касалликлари терминал босқичидаги беморларда умумий ахоли билан солиштирганда, юрак-қон томир касалликларидан ўлим курсаткичи 10-30 марта кўпроқ ташкил этади.
